Министерката за одбрана Славјанка Петровска денеска во Варшава се сретна со нејзиниот полски колега, министерот за одбрана Мариуш Блашчак со кого разговараше за европската интеграција на нашата земја, безбедносната состојба во Европа и развојот на одбранбената соработка помеѓу двете земји – сојузнички во НАТО.
Петровска му се заблагодари на Блашчак за континуираната и гласна полска поддршка за членство на Северна Македонија во Европската Унија, при што истакна дека евроинтеграциите се уште еден начин на зацврстување на единството на европскиот континент и гарантирање на сигурноста на граѓаните.
„Северна Македонија е европска демократија која и во најтешкиот период по руската агресија врз Украина покажа дека целосно ги почитува и ги поддржува меѓународните правила и принципи. Со Северна Македонија како полноправен член, Европската Унија ќе биде побезбедна и посилна“, рече министерката на средбата.
Петровска и Блашчак изразија волја и интерес за засилување на македонско – полската билатерална одбранбена соработка, особено во доменот на заедничките обуки и вежби, при што министерката Петровска посочи дека неодамна завршената вежба „Анаконда 23“ во Полска на која учествуваа македонски офицери е пример за начинот на кој заеднички можеме да ја развиваме интероперабилноста во НАТО.
Во однос на безбедносната состојба на континентот, Петровска ја реафирмираше македонската поддршка за Украина преку хуманитарна и воена помош, имајќи предвид дека Русија ги прекрши принципите на меѓународниот поредок, а Украина има полно право да ги одбрани својата сувереност и територијален интегритет.
Министерот Блашчак се заблагодари за учеството на министерката Петровска на Варшавскиот безбедносен форум и порача дека земјата е отворена за засилување и унапредување на одбранбената соработка со Северна Македонија како земја – сојузник.
Претходно, министерката Петровска се сретна и со Стефан Дион, специјален претставник на Канада за Европската Унија и Европа, со кого разговараше за европската интеграција на земјите од Западниот Балкан.
„Северна Македонија е европска држава која ги споделува европските вредности и припаѓа во Европската Унија. Европскиот пат на Северна Македонија мора да продолжи. Тоа е одговорност на секој политички субјект во Европската Унија и во Северна Македонија и јас очекувам лидерство и храброст да се завршат преземените обврски кои ќе овозможат да чекориме на патот кон полноправно членство во Унијата“, рече министерката.