Брод со најмалку девет лица, кој отплови од островската држава Тринидад и Тобаго кон Венецуела, исчезна во морето и започната е потрага, соопштија спасувачките служби.
Голем број бродови прават тајни премини меѓу двете земји, кои се оддалечени стотици километри, превезуваат илегални мигранти кои сакаат да стигнат до Тринидад и Тобаго, бегајќи од кризата во Венецуела, каде тешката економска ситуација дополнително се влоши со економските санкции.
Други, пак, одат таму од Венецуела за да купат поевтини производи и намирници.
Исчезнатиот брод тргнал во петокот и требало да пристигне во Гуири, североисточна Венецуела, во саботата.
Роднина на еден од патниците во саботата пријавил кај властите дека бродот не пристигнал и потрагата по пловилото почнала вчера. До синоќа ништо не беше пронајдено.
Од 2018 година, повеќе од 100 луѓе ги загубија животите во бродоломи во таа зона. Не е невообичаено бродовите кои пловат кон Тринидад и Тобаго да бидат преполни и често се случуваат несреќи.
Според Обединетите нации, од 2015 година, околу пет милиони Венецуелци ја напуштиле земјата со 30 милиони жители. Од тој број, 25.000 ја избрале Тринидад и Тобаго, земја со 1,3 милиони жители, како своја дестинација.