Имаме лица кои учествувале во ИСИС, тие имаат тука семејства, но дел од нив создадоа и нови семејства во земјите во кои се бореа. Предизвик за нашата земја е ресоцијализацијата на тие лица.
Дехран Муратов
Во полициска акција уапсени се четири лица од струшко-гостиварскиот регион за кои има основано сомнение дека планирале во иднина да организираат одредени несакани настани кои би можеле да ја загрозат безбедноста како на Македонија, така и на други држави.
„Станува збор за терористички организации, четири лица кои се лишени од слобода. Тие, во соработка со лица кои не се на територијата на Македонија, подолг временски период се следат од страна на надлежните безбедносни органи и во соработка со меѓународните пријатели е координирано постапено. Имаме доста докази во насока на поткрепено основано сомнение дека овие лица постапувале во насока да организираат во иднина одредени несакани настани кои би можеле да ја загрозат безбедноста како на Македонија, така и на други држави. Нивната цел била да индоктринираат останати луѓе од Балканот кои би можеле да делуваат соодветно во насока на реализација на нивните цели“, рече министерот за внатрешни работи, Панче Тошковски.
Универзитетскиот професор Владимир Пивоваров за Цивил Медиа вели вели дека за поздравување е акцијата на МВР за сузбивање на терористичката ќејлија во Македонија.
„Во оваа истрага и разузнавање сигурно ни помогнаа НАТО партнерите. Она што е загрижувачки е што во нашата држава има 146 лица кои учествувале во странски боишта. Ние имаме центри за ресоцијализација на таквите лица, меѓутоа, прашањето е колку даваат резултати таквите програми за ресоцијализација. Ние практично имаме „темпирани бомби“ и само прашање на време е кога тие ќе се активираат“, вели тој.
Пивоваров потенцира дека нашиот закон треба да е поригорозен во однос на лицата кои учествуваа(т) во странски боишта. Како пример го наведе британското законодавство каде што таквите лица со семејство ги протеруваат од државата.
Проф. д-р. Трпе Стојановски за Цивил Медиа, вели дека работата на полицијата во соработка со разузнавачките служби е превентивно да делува и рано да ги разбие терористичките групи кои може да предизвикаат сериозни проблеми во државата и регионот. Детектирањето и делувањето на полицијата да спречи можни терористички дејствиа е за пофалба.
„Проблемот кај нас е што имаме лица кои учествувале во ИСИС, тие имаат тука семејства, но дел од нив создадоа и нови семејства во земјите во кои се бореа. Предизвик за нашата земја е ресоцијализацијата на тие лица. Ниту една држава нема доволно ресурси, но државата треба да ги создаде. Но, и покрај ресоцијализацијата, постои опасност тие лица повторно да се активираат, меѓутоа државата треба соодветно и брзо да реагира“, вели Стојановски.
Кривичното дело за кое е поднесена пријавата за четворицата македонски државјани е терористичка организација.