По цели два часа доцнење 15-тата седница на советот на општина Струмица заврши за само пет минути. Несогласувањата околу дневниот ред меѓу советничките групи на ВМРО-ДПМНЕ и СДСМ беа причина за ваквиот тек. Според советникот на ВМРО-ДПМНЕ, Зоран Пакетов, спорно е тоа што во дневниот ред за денеска во кој имаше 50 точки, не беа ставени и точките за разрешување на претседателот на Советот Марјан Даскаловски и именување на нов претседател.
„Покренавме иницијатива да се одзеде мандатот на советникот и претседател на Советот, Марјан Даскаловски бидејќи од 10 мај официјално е избран за пратеник на Република Македонија“, рече Пакетов.
Според советничката група на СДСМ спорно е тоа што не важат истите закони за сите и како што велат нема правна држава.
„На 10 мај оваа власт не ја почитуваше мојата волја како и на уште 33 избрани пратеници кои не го прифативме нашиот мандат. Истото беше направено и во 2011 за градоначалниците на владејачката партија, кога со нивна изјава дека не го прифаќаат мандатот истиот им бил одземен. За нас не важи тој закон, не живееме во правна држава“, рече Даскаловски.
На денешната седница која траеше само пет минути беа донесени со согласност од страна на сите советници четири точки за наредната седница помеѓу кои и предлог реше ние за констатирање на престанок на мандат на претседател на Советот на општина Струмица