Денеска напладне собранискиот спикер Трајко Вељановски ги распиша претседателските избори. Македонија ќе бира претседател на 13 Април, а кампањата може да почне 20 дена пред одржувањето на изборите.
Вељаноски апелираше до сите учесници да се раководат исклучиво по уставните и законските одредби и со своите постапки да демонстрираат дека нивна заедничка цел е просперитетот на Република Македонија.
– Сакам да изразам задоволство од донесувањето на измените на Изборниот законик, усогласени и од власта и од опозицијата. Влегуваме во изборен процес во кој утврдените правила се прифатени и од едните и од другите, при што очекувам истите да се почитуваат, да покажеме демократска зрелост и во мирна и демократска атмосфера граѓаните да одлучат како што тие сметаат – изјави претседателот на Собранието.
Засега во јавноста за можни кандиати се вртат имињата на актулениот претседател Ѓорѓе Иванов како избор на владејачката партија, Стево Пендаровски како избор на опозициската СДСМ, а професорот Јове Кекеновски е единствениот кој сам се номинираше во ВМРО ДПМНЕ за избор за кандидат за претседател.