Министерот за финансии во Владата на Србија, Синиша Мали денеска изјави дека иницијативата „Отворен Балкан“ има за цел значително да го забрза протокот на стоки и услуги, да создаде единствен пазар на труд и подобри деловни услови за компаниите, што неминовно ќе доведе до побрз економски развој и повисок животен стандард на граѓаните на земјите потписнички на договорот во рамките „Отворен Балкан“.
На влезната (српска) страна на граничниот премин Прешево – Табановце е поставен знак „Отворен Балкан“ со кој се означува лентата наменета за превозници на компании од Србија, од Северна Македонија и од Албанија со статус на овластен деловен субјект (АЕО).
Министерот Мали најави дека ќе се продолжи со спроведување на иницијативата „Отворен Балкан“, со цел да се олесни бизнисот и да се забрза протокот на стоки.
„Камионите не треба да чекаат со часови на границите, туку сите потребни процедури да се спроведат брзо и ефикасно“, нагласи министерот Мали и додаде дека на овој начин се слуша гласот на стопанството и влијанието на натамошното подобрување на економскиот амбиент.
Тој напомена дека иницијативата „Отворен Балкан“ е од големо значење за зајакнување на регионалната соработка и за зајакнување на нашите економии и потсети дека во рамки на наведената иницијатива се потпишани договори кои освен за олеснување на трговијата треба да придонесат и за соработка во областа на храната, фитосанитарната и ветеринарната инспекција.
Мали потсети и дека е потпишан договор со кој ќе се овозможи воведување на единствена работна дозвола меѓу Србија, Северна Македонија и Албанија, што ќе направи, како што нагласи, да сме уште попривлечни за инвеститорите, кои ќе можат да добијат работници од сите три земји.
„Ги решаваме прашањата што ја мачат економијата, како што се чекањето на границите и комплицираните административни процедури или недостигот на работна сила. Сето тоа се работи кои носат многу придобивки за сите земји членки на Отворен Балкан“, заклучи Мали.