Притисоците и заканите се очигледни и ги има насекаде, со цел да не биде успешен штрајкот на просветарите, велат од просториите на СОНК во струмичко – радовишкиот регион.
„Од вчера колегите почнаа телефонски да се јавуваат за да ни кажат дека имаат засилени притисоци да не излезат на штрајк. Денеска од општина Босилово токму поради тие причини рекоа дека најверојатно нема да го поддржат штрајкот во понеделник“, вели претседателот на СОНК во Струмица, Никола Џорлев.
Тој смета дека ги плашат и родителите и професорите со парични казни и отказни решенија, иако, како што вели, немаат никаква правна основа да го направат тоа.
Низ училиштата во Струмица за НОВА велат дека денеска треба да ја потврдат одлуката за излегување на штрајк, но и дека има одредени закани по професори кои не се членови на СОНК.
Професор од едно училиште во Струмица за НОВА вели дека за време на штрајкот ќе зема боледување, со цел да ги избегне притисоците и заканите, несакајќи да ја поддржи одлуката да не се излезе на штрајк.
Од Министерството за образование на само неколку дена пред најавениот генерален штрајк на СОНК, упатија апел до родителите, дека ако не ги пуштаат децата од понеделник на училиште, ќе плаќаат казни од 1.000 до 2.000 евра затоа што го оневозможиле наставниот процес за своето дете.