Во преполна сала на универзитеот ФОН, вечерва беше промовирана книгата на новинарот Томислав Кежаровски, кој поеќе од две и пол години помина во куќен притвор, затоа што не сакаше да го открие името на извор во еден од неговите новинарски текстови.
Книгата насловена како „Живот во кутија“ ја промовираа Нано Ружин, Маја Стевановиќ и Синиша Станковиќ.
Професорката Стевановиќ рече дека оваа книга во која Кежаровски го опишува периодот пред, во и по затворот, треба да служи како документ за случајот Кежаровски и времето во кое диктатурата беше во полн ек, а сите граѓани беа жртви.
Таа рече и дека ова дело може да се гледа како уште еден активистички проект на Кежаровски во борба за вистината.
Кежаровски кого присутните го дочекаа со овации и ракоплескање, рече дека посакува оваа книга да е последна од ваков вид во Македонија, а тој да е последниот кому неправедно му се судело.
– Ме повредија, ми го повредија семејството и заради нив изгубивме близок член на семејството. Не сум одмаздољубив човек, но никогаш нема да заборавам и да простам – рече Кежаровски.
Кежаровски испрати порака за сите политичари и рече дека тие осум различни луѓе со различни карактери, националности живееле во осум квадрати, па така и во Македонија има место да живеат два милиони граѓани.
На промоцијата двајца актери прочитаа дел од книгата на Кежаровски, во која тој опишува како додека се обидувал да заспие во келијата во затворот, некој од чуварите му донел весник „Нова Македонија“ во кое било скриено писмо од неговата ќерка. На промоцијата присуствуваа многу новинари, активисти, политичари, граѓани и високи претставници од власта.
