Просечната месечна пензија на крајот на минатата година изнесуваше 15.876 денари, а на крајот на 2022 година проекциите се дека ќе биде околу 17.300 денари.
Ова го истакна премиерот Димитар Ковачевски по денешната средба со претседателката на Сојузот на здруженија на пензионерите Станка Трајкова.
„Минатата недела преку отворен дијалог со пензионерите обезбедивме континуиран раст на пензиите, а со тоа и на нивниот животен стандард и квалитетот на живот. Го прифативме моделот на Сојузот на здруженија на пензионерите што го предложија како нова методологија за континуиран раст на пензиите. Она што го ветивме низ дијалогот со пензионерите го реализираме во најбрз можен рок и ќе почне да се применува со септемвриската пензија. Денеска слушнав и други конструктивни предлози кои се од интерес на пензионерите и ќе бидат разгледани со ресорните министерства“, рече Ковачевски и додаде дека новата методологија ќе овозможи пораст на пензиите и во наредните години без никакви влијанија.
Порача дека во 2022 година заедно со финансиската помош пензионерите во просек годишно ќе имаат по околу 12.000 денари повеќе во споредба со 2021 година.
„Во март и во септември во иднина ќе се прави новото усогласување на пензиите зашто Државниот завод за статистика тогаш ги обвјавува официјалните податоци за растот на просечната плата“, рече Ковачевски и додаде дека Владата веднаш ќе почне се примена на новата метода, а пензионерите своите покачени пензии ќе ги добијат од септември годинава.
Претседателката на Сојузот на здруженија на пензионерите Станка Трајкова посочи дека пензионерите на средбата со премиерот побарале решение на повеќе прашања и проблеми со кои се соочуваат лицата од третото доба од доменот на здравственото осигурување, социјалното домување, пензионерските и старечките домови.
„Пензиите како системско и законско решение ќе се усогласуваат два пати во годината и тоа со 50 отсто од порастот на платите на сите вработени и со 50 отсто од порастот на трошоците на животот“, истакна Трајкова.
Околу 330.000 пензионери ќе добијат и директна финансиска помош од по 1000 денари за месеците март, април и мај.