На чело со градоначалникот на општина Бутел, Петре Латиновски и членови и симпатизери на владејачката партија ВМРО-ДПМНЕ, денеска се одржа 15-минутен мирен протест пред МВР каде повикувајќи се на жителите на Бутел, демонстрантите побараа оставка од министерот Оливер Спасовски.
Тие велат, Спасовски не ги заштитил жителите на Бутел за време на демонстрациите предводени од функционерите на ДУИ при неодамнешното уривање на камен-темелникот каде што е предвидена изградба на крст, на кружниот тек помеѓу општините Чаир и Бутел.
– Се надевам дека овој глас ќе допре таму каде што треба, верувам во институциите, верувам во институцијата Министерство за внатрешни работи. Досега сите вработени во оваа институција покажале дека се професионалци и знаеле да си ја завршат работата и да ги заштитат граѓаните, рече Латиновски во изјава за медиумите.
Тој ги отфрли шпекулациите дека е донесено решение за повлекување на одлуката за изградбата на крстот и вели ниту тој како градоначалник, ниту некој друг имал право да ја поништи одлуката.
Одговарајќи на новинарско прашање, зошто се инсистира на верски објект во време кога општина Бутел има голем број невработени граѓани, Латиновски потенцира дека неговата општина нема да потроши ни денар за предвидениот крст.
– Општината Бутел нема да издвои ниту еден денар за изградбата на овој верски објект. Тоа е иницијатива на Светскиот македонски конгрес, кој исто така е и инвеститор. Ние преку проекти сме покажале дека општина Бутел е пристојно место за живеење, изјави Латиновски.
Присутните побараа од Спасовски соодветно да го заштити местото, за да продолжи изградбата на верскиот објект во мултиетничката општина, а на мегафон порачаа дека крстот ќе продолжи да се гради без оглед на се.
Овие протести пред МВР се случуваат веќе неколку пати, а се резултат на уривањето на камен-темелникот за предвидениот крст, поставувањето на албански знамиња и шатори на местото.