Рускиот претседател Владимир Путин во денешното обраќање истакна дека се оди според планот во Украина и дека руската војска ќе ги исполни своите цели во рамки на „специјалната воена операција“.
Санкциите што ги воведоа западните земји кон Русија, за Путин се „налик на објава на војна“, меѓутоа ја бранеше руската инвазија на Украина порачувајќи дека Москва треба да ги брани оние кои говорат руски на истокот на земјата, како и своите интереси.
Овие санкции што се објавени се налик на војна, но фала му на Бога што не дојде до тоа, рече Путин, обраќајќи се пред група на вработени во центарот за обука на Аерофлот во близина на Москва.
Првиот човек на Кремљ изјави дека Русија сака Украина да се „демилитаризира, денацифицира и дека треба да има неутрален статус“.
Путин, исто така, најави дека секоја земја што ќе се обиде да воспостави зона на забранети летови на украинското небо, ќе се третира како противник во војната. Северноатланстаката Алијанса, пак, претходно, го отфрли барањето на Киев за воведување на зона на забранети летови над Украина.
Секој развој на случувањата во тој правец, ќе го сметаме како учество во вооружен судир на секоја земја на чија територија би била создадена закана за нашите војници, нагласи Путин за можноста „за зона за забранети летови над Украина“.
Путин рече дека Русија не планира да прогласи вонредна состојба, како одговор на гласините дека ќе се направи тоа поради конфликтот во Украина.
Вонредна состојба се воведува (…) во случај на агресија, посебно во областите во кои се водат борби. Ние немаме таква ситуација и се надевам дека ќе нема потреба да се интервенира, рече Путин.
Според неговите зборови, во руските воени операции во Украина учествуваат само професионални војници и офицери, а Кремљ не планира да испраќа резервисти или воени ветерани.
Нашата војска ќе ги исполни сите задачи. Во тоа воопшто не се сомневам. Сè оди по планот, посочи рускиот претседател.
Бројни гласини ги принудија Русите да стравуваат од мобилизација и воведување на вонредна состојба.