Русија денеска го одбележува Денот на победата над фашизмот и 77 години од победата во Втората светскат војна во која тогашниот СССР загуби 27 милиони луѓе од кои 14 милиони беа цивили. Прославата ќе биде на традиционален начин – со голема воена парада на Црвениот плоштад во Москва која, сепак, ќе биде во специфични околности поради инвазијата врз Украина што почна на 24 февруари.
Затоа и годинашната Парада на победата во Москва и обраќањето на рускиот претседател Владимир Путин се очекуваат со особено внимание.
Западните медиуми шпекулираат што би можело да се случи денеска, па одат од крајност во крајност – од тоа дека целта на Москва е да го заврши конфликтот во Украина до Денот на победата до можноста Путин да прогласи војна во Украина и да објави општа мобилизација во земјата.
Паради, покрај во Москва, ќе се одржат во уште 28 градови и во нив ќе учествуваат 65.000 лица, 2.400 вооружени единици и над 460 авиони.
Низ Црвениот плоштад ќе продефилираат 11.000 војници и 131 вооружена единица додека над руската престолнина ќе летаат 77 авиони и хеликоптери.
Парадата на победата во ерата на СССР се одржуваше само на јубилејни годишнини, а од 1995 година се организира секоја година.
Меѓу гостите во ВИП ложата овојпат ќе нема странски претставници што од Кремљ го објаснуваат дека не станува збор за јубилеј.