Претседателот на СДСМ Зоран Заев при денешното обраќање до јавноста ги повика сите граѓани професори, лекари, работници, студенти, земјоделци, заедно со СДСМ да се приклучат на масовниот протест пред Уставниот суд, кој што е најавен од граѓански организации за утре попладне.
Како што напомена Заев, Македонија не смее да молчи и да дозволи да се урнат темелите на правото.
-Повикувам на одбрана на Уставот, повикувам на одбрана на правдата, срамните одлуки на партиските инсталации во Уставниот суд се обид да се амнестира изборен криминал и изборна измама, потенцираше Заев.
Тој дополни дека токму Вистината за Македонија и како што вели „хаосот во избирачкиот список“ потврдиле дека Груевски и ВМРО-ДПМНЕ освен што ги краделе парите на граѓаните, го краделе и правото на слободен глас.
Како што претходно соопшти Платформата за граѓанска политика АЈДЕ!, утре во 18 часот, пред Владата ќе започне протестен марш, кој ќе продолжи покрај канцеларија на претседателот Ѓорѓе Иванов и Собранието, а ќе заврши пред Уставниот суд со голем народен протест.
Вечерта, како што најавија организаторите, пред Уставниот суд ќе се одржи бдеење над Уставот, а ќе кулминира во среда кога ќе ги пречекаат уставните судии кои на седница треба да одлучуваат за иницијативата, да се прогласат за неуставни дел од одредбите на Законот за помилување.
Доколку и во втората фаза во среда помине Иницијативата за ваква измена, која наиде на бурни реакции во јавноста, тогаш претседателот ќе има зголемени ингиренции и ќе може да помилува затвореници кои се осудени за изборен криминал, кривични дела против полова слобода и морал и недозволено производство и пуштање во промет на дрога.