Заев во саботата јасно посочи дека е неверојатно Груевски да е толку наивен и да мисли дека лидерот на СДСМ во разговор ќе го открие идетнитетот на лицата што ги доставиле доказите до него, се вели во реакцијата што вечерва стигна од опозициската партија на видеото што попладнево го објави „Сител“.
Телевизија „Сител“ во својот централен Дневник објави видео од еден од четирите разговори меѓу премиерот Никола Груевски и лидерот на СДСМ, Зоран Заев, на кој се зборувало за компромитирачките содржини што ги поседува опозиционерот за властодршците.
„Скандалозна е видео снимката од кабинетот на Никола Груевски објавена во дневникот на провладината „Сител“. Тоа е класична потврда и клучен доказ за тоа кој во Македонија снима и следи комуникации. Кој може друг да снима во неговиот кабинет освен Никола Груевски? Овој пример покажува како функционира Груевски и го потврдува сето она што го зборува претседателот на СДСМ, Зоран Заев. Еве како се следи и се снима лидерот на опозицијата. Еве како се следат и се снимаат илјадници граѓани во Република Македонија. Прикажаниот видео материјал потврдува дека Никола Груевски ги снима оние коишто доаѓаат на политички средби во неговиот кабинет. Пример без преседан во Европа. Со ваквото постапување Никола Груевски прави кривично дело неовластено снимање и прислушкување. Денеска „Сител“ сето тоа го покажа на виделина пред јавноста“, реагира СДСМ.
На видеото со слаб квалитет, според „Сител“, може да се чуе дека Груевски го прашува Заев од каде му се материјалите, а овој одговара дека му се од странски служби.
„Сител“ тврди дека видеото го добила од видео-сервисот Јутјуб. Телевизијата целиот материјал ќе го објави во вечерните вести.
Груевски во саботата, при обраќањето кон нацијата, го обвини Заев дека го уценувал да прифати техничка влада, а во спротивно лидерот на опозицијата ќе објавел компромитирачки материјали за дел од функционерите. Поради ова полицијата ја спроведе акцијата „Пуч“ во која Заев е еден од четворицата осомничени.