По повод Меѓународниот ден на музеите – 18 Мај, Музејот на современата уметност вечерва ќе го продолжи времето на работење и за посетителите ќе биде отворен до 2 часот
Музејските работници го одбележувааат Меѓународниот ден на музеите – 18 Мај, во градот на културата – Крива Паланка денеска ќе се одржи советување на тема „Музеи (меморија+креативност) = општествена промена“ каде што ќе учествуваат Никос Чаусидис и Драгор Заревски од Филозофски факултет при УКИМ, Даниела Трајковиќ-Крстиќ од Музејот на македонската борба, Рубинчо Белчески од Завод за заштита на спомениците на културата и музеј – Прилеп и други.
Во Завод и музеј – Битола, во 20 часот ќе биде отворена изложбата „Праисториските дами од Македонија“ на Музејот на Македонија, чиј автор е археологот Ирена Настева-Колиштркова, а во „Магаза“, еден час подоцна, и годишната ликовна изложба на Друштвото на ликовни уметници на Битола. Во текот на денот е предвидено одржување и едукативни работилници во рамките на проектот „Учиме за нас“, наменети за деца и ученици од различни возрасни категории.
Во Музејот на град Скопје денеска ќе се одржуваат едукативни работилници од проектите „Јас во музеј“ и „Музејот за децата – децата за музејот“ за деца од градинки и од основни училишта.
Едукативна програма за децата ќе се одвива утре и во Музејот на Македонија, со учество на Детскиот музејски клуб во 11 часот, а планирана е презентација на анимираниот филм „Џоломари“. Во рамки на проектот „Урбана култура“, презентација ќе имаат ученици од гимназијата „Орце Николов“.
Во Музејот на македонската борба од 10 до 19 часот ќе може да се погледне картофилската изложба „Тетово на старите разгледници“, чиј автор е Бранислав Светозаревиќ, а од 18 до 19 часот ќе биде одржан концерт на традиционална музика и игра со ансамбл „Македонија“
Музејот на современата уметност вечерва, ќе го продолжи времето на работење и за посетителите ќе биде отворен до 2 часот. Тоа ќе биде можност да се посетат тековните изложби: „Хенри Мур графичарот“ и 10. Биенале на млади уметници „Солидарност – 50 години од катастрофалниот земјотрес во Скопје“.