Фотографија: Солза Грчева и Роза Топузовска Каревска седат сами во делот предвиден за опозицијата додека пратеникот Амди Бајрам ги поздравува
Собраниската седница на која што како прва точка беше поставено утврдувањето на нацрт-амандманите од Уставот денеска започна со 69 пратеници, а засега помеѓу отсутните е и лидерот на ДУИ Али Ахмети. Помеѓу отсутните е и пратеничката и сега веќе екс-член на СДСМ Љубица Буралиева, како и пратеничката Светлана Јакимовска, но и други пратеници.
На јулската седница годинава кога пратениците гласаа за пристапување кон уставни измени, Али Ахмети дојде лично на почетокот на седницата и гласаше за промени. Пратениците на ДПА беа единствените кои гласаа „против“.
Седницата започна со останатите точки од дневниот ред кои што првично беа предвидени за дискусија по гласањето за уставните нацрт-амандмани. Се шпекулира дека отсутните ќе стигнат до крајот на седницата, но нејасно е кој ќе биде 82 пратеник од опозициските кои ќе се приклонат кон идејата на власта за промени во Уставот. На власта и се потребни 82 гласа за да може да ги усвои аманданите. Владејачката ВМРО-ДПМНЕ има 61 пратеник, ДУИ 19, а заедно со едниот пратеник на ГРОМ, владејачката коалиција има 81 пратеник.
Од 123 пратеници, Парламентот во моментов го бојкотираат вкупно 37 пратеници од кои 31 се од СДСМ и опозицијата, 6 се од ДПА и 1 е од НДП.
Доколку денеска се изгласаат амандманите, ќе следи 30-дневна јавна дискусија по која што Владата треба повторно до Собранието да достави нови предлог-амандмани со вградени забелешки од дискусијата. Очекувањата се дека постапката за носење на уставните измени треба да заврши до крајот на октомври.
Владата до Собранието минатиот месец достави предлог за измена на Уставот со седум нацрт-амандмани кои предвидуваат дефинирање на бракот како заедница на маж и жена, како и дефинирање на вонбрачната заедница; измени во составот на Судскиот совет, менување на името на Народната банка во Македонија; регулирање на фискалната политика во делот на висината на јавниот долг; формирање на финансиска зона; Државниот завод за ревизија да биде независен орган биран од Собранието и менување на надлежностите на Уставниот суд, односно Судот ќе може да одлучува по уставната жалба за човекови права, како и за одлуките на Судскиот совет и Советот на јавни обвинители.
Дефинирањето на бракот како заедница помеѓу маж и жена и можноста за формирање финансиски зони, односно таканаречени даночни раеви во земјава се едни од најконтроверзните нацрт-амандмани