Сојузништвото од поранешна Југославија, Република Северна Македонија и Република Словенија го продолжуваат и во изминатите три децении по распадот на некогашната заедничка држава. Република Словенија е прва држава која ја призна тогаш Република Македонија и со која воспостави дипломатски односи а со тоа е и прва држава која отвори амбасада во земјава. А точно првата амбасада што ја има отворено нашата држава во странство, беше онаа во Љубљана, беше речено на заедничкото одбележување на 30 години од воспоставувањето на дипломатските односи меѓу двете држави.
– Денешниот настан е суштинска точка на тоа пријателство, кое се одвива во континуитет. Ја имавме целосната поддршка од Словенија кога претседаваше со ЕУ, заклуичоците од Самитот во Блед , беа за интеграција на ите земји од Западен Балкан во ЕУ. Словенија е наш голем бизнис партнер, во македонско-словенечкото бизнис здружение се имаат регистрирано 130 бизнисмени од Словенија, рече министерот Османи.
Односите меѓу Македонија и Словенија се повеќе од само односи во политиката, економијата и културата, додаде словенечкиот амбасадор во земјава Милан Предан, кој потоа му даде предност да говори преку видео врска на словенечкиот министер за надворешни работи Анже Логар.
– Република Словенија и Северна Македонија ја покажаа својата желба за демократија за споделување на напредните вредности со што и дипломатските врски воспоставени на 17 март 1992 година, можат и се надградуваат на нова основа. Важно е да се напомене дека и во војната во Украина и двете земји одбраа да застанат на вистинската страна преку членството во НАТО придонесуваат кон светскиот мир. А воедно посакуваме што побрзо да ги почнете преговорите со ЕУ, а ние сме тука да ве поддржиме, изјави словенечкиот шеф на дипломатијата.
На настанот неколку музички нумери изведе хорот „ Франце Прешерн“ од Скопје.
(М. Т.)