Владата, столбовите од новата барокна ограда, Министерството за правда, Народната канцеларија на Претседателот и Собранието беа цел на чаталот со кој Шарената револуција денеска го започна и го финишираше протестот.
„Ќе се чаталиме до слобода“ гласеше мотото под кое поворката од Специјалното јавно обвинителство, маршираше до Илинденска каде што е седиштето на власта. со два импровизирани чатали, обоена беше барокната зграда, а т.н “командоси“ на Шарената револуција со нови пластични пушки ги обоија барокните столбови.
Таквиот чин беше поздравен со овации од страна на сите присутни на протестот.
Додатна количина боја беше фрлена и врз веќе обоената зграда на Министерството за правда и Народната канцеларија на претседателот Ѓорге Иванов.
Пред присутните на бина поставена пред Собранието, денеска говореа Михаела Ивановска, како и Претседателот на комисијата за транспорт и врски на СДСМ, Благој Бочварски.
Ивановска набројуваше што се поминало и било дозволено од страна на власта и на што се спротиставуваат граѓаните, додека Бочварски порача дека работите ќе се менуваат тогаш, кога ќе се смени и оваа гарнитура која владее 10 години.
Протестот исто така беше и во знакот на возачот на пик-апот на „Шарената револуција“, Џовани, кој беше повикан на распит во полициската станица „Пролет“ поради учество во протестите и со сомнение за кривично дело “оштетување туѓи предмети“
Возилото инаку и денес во 18 часот пристигна пред зградата на СЈО, по вчерашните случувања.
Посебен момент и скандирања пред Собранието се одбележа кога 87-годишна постара госпоѓа се појави на протестите и со боја во раката демонстрираше дека и таа е припадничка на Шарените.
За нејзиното појавување на протестот во ова видео, додека утре во рубриката „Зошто протестирам?“ на НОВА, и нејзина изјава.
Денешниот протест заврши пред Собранието, каде што врз фасадата беа фрлени уште неколку балони со боја, кои продолжуваат и утре по собирот пред СЈО во 18 часот.