Предлогот на градоначалникот на Општина Центар Андреј Жерновски, со кој тој денеска на седницата на Советот на Општината побара да се тргнат од дневниот ред точките кои предвидуваат промена на деталните урбанистички планови за Центар, не беше изгласан од Советот.
Клучен за одбивањето на барањето на Жерновски беше гласот на актуелниот претседавач на Советот Мирослав Шиповиќ кој за предлогот гласаше воздржано.
Со 11 гласа против и 11 гласа за, како и воздржаниот глас на Шиповиќ не се прифати предлогот на градоначалникот.
Седницата во Општината Центар сè уште трае. Речиси три часа советниците не можеа да се усогласат околу дневниот ред на седницата, а расправите беа придружени со неколку долги паузи на Советот.
Советникот на ВМРО-ДПМНЕ Илија Илиоски веќе ја повлече петнаесетата точка од јавниот ред со која се предвидуваа промени во деталниот урбанистички план Мал Ринг, односно делот околу ГТЦ.
Последните две точки на дневниот ред, односно 16-тата и 17-тата точка се однесуваат на промени во деталните урбанистички планови Градска четврт Капиштец и Тасино Чешмиче – Водно.