Шпанското обвинителство побара затворање, без можност за кауција, на осум екс министри на разрешената каталонска Влада и најави, спроред шпанските медиуми, дека ќе испрати европски мандат за апсење на екс претседателот на Каталонија Карлес Пучдемонт кој се наоѓа во Белгија.
Членовите на разрешената каталонска Влада без повикани денес во Мадрид пред Врховниот суд на Шпанија. Обвинителството ги обвинува за “побуна” и “непослушност”. На барање на адвокатите одлуката на судот беше одложена за 9 ноември.
За тоа време во Барселона се одржуваат протести како поддршка на разрешените министри.
Пред судот во Мадрид денес се појавија шестмина министри помеѓу кои и претседателката на каталонскиот Парламент Карме Форкадел во рамките на судската процедура отворена на 27 октомври, денот кога Парламентот прогласи независност на регионот.
Во судот не се појави Пучдемонт како и други четворица екс министри. Тој во понеделникот допатува во Брисел каде одржа прес конференција на која информираше дека нема да бара политички азил во Белгија но побара гаранции за фер судење во Шпанија обвинувајќи го шпанското судство за политизирано. Во меѓувреме тој останува во Белгија, информираше неговиот белгиски адвокат Пол Бекерт.
Во средата вечер Пучдемонт изјави дека Шпанија води “политички процес” па поради тоа тој нема да одговори на повикот на шпанскиот суд. Преку соопштение тој вели дека Шпанија сака да направи поделба помеѓу каталонските министри. Некои од нив “ќе одат за да покажат дека шпанското судство гони политички определби” а другите “ќе останат во Брисел за да ја запознаат меѓународната јавност со овој политички судски процес”, вели Пучдемонт.
Според белгискиот весник “La Libre Belgique”, екстрадицијата на Пучдемонт нема да оди така лесно.
По издавањето на европски мандат за аспење на Пучдемонт, белгиското судство ќе треба да одлучи дали позитивно ќе одговори на ова барање на Шпанија. Белгиското судство е независно и политиката не може да игра улога во одлуката на белгискиот суд, но извесно е дека одлуката ќе донесе дипломатски последици помеѓу Белгија и Шпанија.
Според адвокатот Денис Боске, во изјава за белгискиот медиум, за да може да има екстрадиција белгиското право треба исто така да ги признава обвиненијата како престапи. Но, во овој случај, обвиненијата за “побуна” и “непослушност” за белгиското судство остануваат нејасни. Членот 5 на белгискиот закон, со кој се транспонира европскиот мандат за апсење, содржи список од 32 престапи помеѓу кои не се наоѓаат “побуната” и “непослушноста”.
“Се ќе зависи од начинот на кој шпанското судство ќе го образложи европскиот мандат”, објаснува адвокатот Боске, експерт по кривично право. “Белгискиот судија може да го одбие шпанското барање доколу смета дека оваа одлука може да ги наруши фундаменталните права и особено правото на фер судење”, вели медиумот. Со оглед на оваа специфика на белгиското право станува јасно зошто Пучдемонт дојде во Белгија и го ангажираше адвокатот Бекерт, експерт за човекови права.