Директорот на Државниот завод за статистика (ДЗС), Апостол Симовски вечерва изјави дека неопфтеното население со Пописот 2021 од 7,3 отсто или 132.000 граѓани не е неочекувано ако се земат во предвид сите работи и оти очекувал тој број да биде поголем. Една од причините, како што рече, е бојкотирањето на пописот.
Тој образложи дека Пописот 2021 беше спроведуван во временски период кој е несоодветен за попис, кога нашето население користи годишни одмори, во состојба со ковид-19, а пред тоа имаше затворени граници и не можеше да се оди на одмор, кога се интензивни работите во земјоделството, на нива, посочи и на немарноста на луѓето… Нагласи дека попишувачите не ги наоѓале овие луѓе, иако им оставале пораки.
„Дадовме можност за сите, последните 10 дена од пописот отворивме пунктови каде секој, кој по било кој основ не е опфатен, да се попише“, изјави Симовски за ТВ Канал 5 и додаде дека „овие 132.000 граѓани влегуваат во делот на резидентно население, кое се попишува според законот“. Според него, ова е нормална појава и секаде се случува.
Прашан за повиците за бојкот на пописот, директорот на ДЗС изјави дека нема информации дали некој одговарал кривично или прекршочно.
„Не би сакал никој од граѓаните да одговара. На крајот на краиштата, тие кои одговорија на повикот за бојкот беа изманипулирани граѓани. Клучен е тој што повикуваше на бојкот, инаку граѓаните беа жртви и мислам дека сега сфаќаат“, рече Симовски.
Тој рече дека не сака да споменува политички партии или други структури кои повикуваа на бојкот на Пописот 2021.
„Секој кој повикуваше на бојкот, во суштина правеше само лошо. Тие што повикуваа на бојкот, не и мислат ништо добро на државата и тоа се покажа сега во суштина“, нагласи Симовски.