На седницата за предложените измени во деловникот изби скандал – поради недостиг на кворум со оглед на тоа што пратеницитен а ДУИ не се појавија. За да се обезбеди кворумот, пратениците од ВМРО ги повикале и своите заменици членови.
На ова реагираше пратеникот Изет Зекири од НПД кој побара да се поништи седницата. Според Зекири, ова е грубо кршење на деловникот бидејќи не може и членовите и замениците на членовите на една иста партија да бидат на седница и двајцата да гласаат.
“Не може заменици членови на ВМРО да заменуваат членови на други политички партии. Па ако е така, тогаш ВМРО ДПМНЕ може без проблем и без ДУИ да си го донесе и законот за бранители. Ова е без преседан, скандал. Јас повеќе немам верба во деловникот”, вели Зекири
Александар Николоски од ВМРО ДПМНЕ, претседател на комисијата, му одговори на Зекири велејќи дека тој не го разбирал деловникот.
“Секоја комисија има членови и заменици членови и освен за претседателот, каде што има заменик претседател ниеден член не е поименично поврзан со ниеден заменик, така што имате апсулотно погрешно толкување на деловникот”, рече Николоски
Зекири за Нова раскажува дека на почетокот на седницата дошле 4 пратеника. Откако Николоски увидел дека нема кворум бидејќи никој од ДУИ не бил присутен, си повикале и двајца заменици на членовите од ВМРО ДПМНЕ. Зекири најавува дека ќе ја спори одлуката донесена на оваа комисија како нелегитимна.
Во секоја од собраниските комисии се бираат членови и заменици на членовите, кои во случај на отсуство на членот можат да учествуваат на седниците наместо него.
Во видеото погледнете го целиот коментар на пратеникот Изет Зекири за денешните случувања во парламентот.