Кривичниот суд попладнево во соопштение информираше за тоа кога застарува извршувањето на сите изречени казни по пресудите против поранешниот премиер Никола Груевски, чие евентуално испорачување во Македонија стана актуелно по катастрофалниот изборен пораз на неговиот домаќин во Унгарија, Виктор Орбан.
Според Судот, некои од делата на Груевски кои ги водеше поранешното Специјално јавно обвинителство (СЈО), се веќе застарени, но повеќето се активни, а едно од нив застарува за дури 16 години.
„Во моментот, против осуденото лице се активни две потерници за извршување на санкции, и тоа по пресуди познати како:
„Насилство во Центар“, со пресуда К.бр. 1904/16, за која е оформен предмет за извршување на затворска казна КУИКП 1094/21, во траење од 1 година и 6 месеци, чие извршување застарува на 10.09.2027 година; како и предметот познат како „Плацеви на Водно“, со пресуда КОК 63/21, за кој е оформен предмет за извршување на затворска казна КУИКП 732/23, со единствена казна затвор од 9 години, чие извршување застарува на 14.02.2043 година. Со оглед дека за истиот предмет е изречена и парична казна која не е наплатена, истата е заменета со казна затвор во траење од 180 дена, чие извршување застарува на 14.02.2027 година“, велат од Кривичниот суд.
„Во однос на предметот познат како „Тенк“, со пресуда КОК 59/17, за кој е оформен предмет за извршување на казна затвор во траење од две години (КУИКП 1807/18), ја известуваме јавноста дека извршувањето на казната е застарено на 16.10.2024 година, поради исполнување на роковите утврдени со Кривичниот законик. Со оваа пресуда Н.Г. е огласен за виновен за сторено кривично дело Примање награда за противзаконито влијние од чл. 359 ст.2 од КЗ и осуден на казна затвор во траење од две години, која пресуда е правосилна од 4.10.2018 година. Апсолутна застареност за извршување на оваа пресуда согласно одредбите од чл. 109 и чл. 111 од КЗ, настапила на 04.10.2024 година.
Поради тоа, судот по службена должност донел решение за апсолутна застареност на извршувањето на санкцијата.
Дополнително, активни се и предмети во кои на истото лице му се суди во отсуство, со оглед дека не е достапно за органите на прогонот, и тоа предметите познати во јавноста како „Титаник“ и „Талир 2“, додаваат од Кривичниот суд.