Утре во Собранието започнува комисиската расправа за нацрт-амандманите за измени во Уставот кои ги достави Владата, а на дневен ред е и ребалансот на буџетот. Два дена по утрешната комисија која ја закажа претседателот на Собранието Трајко Вељановски, треба да се закаже и собраниската седница на која што со 62 или повеќе гласа може да бидат изгласани нацрт-амандманите. Доколку се изгласаат, ќе следи 30-дневна јавна дискусија по која што Владата треба повторно до Собранието да достави нови предлог-амандмани со вградени забелешки од дискусијата. Очекувањата се дека постапката за носење на уставните измени треба да заврши до крајот на октомври.
Во меѓувреме, министерот за правда побара и мислење од Венецијанската комисија на чија што веб страницата информираат дека на 5 Август годинава „министерот за правда побарал од комисијата да даде толкување на 7 амандмани од Уставот, пред се на оние кои се однесуваат на на Судскиот совет, надлежностите на Уставниот суд и Државниот завод за ревизија.
Владата до Собранието минатиот месец достави предлог за измена на Уставот со седум нацрт-амандмани кои предвидуваат дефинирање на бракот како заедница на маж и жена, како и дефинирање на вонбрачната заедница; измени во составот на Судскиот совет, менување на името на Народната банка во Македонија; регулирање на фискалната политика во делот на висината на јавниот долг; формирање на финансиска зона; Државниот завод за ревизија да биде независен орган биран од Собранието и менување на надлежностите на Уставниот суд, односно Судот ќе може да одлучува по уставната жалба за човекови права, како и за одлуките на Судскиот совет и Советот на јавни обвинители.
Дефинирањето на бракот како заедница помеѓу маж и жена и можноста за формирање финансиски зони, односно таканаречени даночни раеви во земјава се едни од најконтроверзните нацрт-амандмани.