Низ македонските амбасади во голем број држави знамињата се спуштени на половина копје, а во амбасадата во Софија уште од изутрина граѓани оставаат цвеќиња, свеќи и играчки. Сочувство за огромната трагедија изразија и голем број светски и државници од регионов.
Амбасадорката на САД во земјава Кејт Мери Брнс со сочувство за жртвите.
„Во име на американската амбасада сакам да изразам најдлабоко сочувство до семејствата на оние кои ги загубија своите најблиски и наша поддршка за повредените, како и до оние кои беа скршени од тага кога дознаа за овој трагичен настан“, истакна Кејт Мери Брнз.
Евроамбасадорот во земјава Дејвид Гир изрази длабоко сочувство.
„Нашите мисли во ова време, се со семејствата и пријателите на оние кои починаа во трагичната автобуска несреќа во Бугарија рано утринава. Посакуваме целосно и брзо опоравување на повредените“, вели Дејвид Гир.
Сочувства за изгубените животи во автобуската несреќа пристигаат и од голем државници. Претседателите на Европскиот совет Шарл Мишел, парламент Давид Сасоли, на Европската комисија Урсула фон дер Лајен, изразија сочувство за загинувањето на 46 лица.
„ЕУ е солидарна со вас во овие ужасни времиња“, посочи Урсула фон дер Лајен
Рускиот претседател Владимир Путин испрати писмо со сочувство до претседателот Стево Пендаровски.
„Прифатете го моето најдлабоко сочувство во врска со смртта на гтраѓаните на вашата земја вклучително и деца и младинци, предизвикана од сообраќајната несреќа во Бугарија“, порача Владимир Путин.
Сочувство изрази и претседателот на Албанија Илир Мета кој наведе дека е голема и длабока тагата за трагичната загуба на жртвите од несреќата. Албанскиот премиер Еди Рама напиша дека е огромна болката за загубените животи.
„Не постои збор за трагедија на автобусот од Северна Македонија во Бугарија, каде животот го загубија речиси сите патници…. Болка“, додава Еди Рама.
Косовскиот премиер Албин Курти изрази целосна подготвеност за да понуди било каква помош, а претседателката Вјоса Османи со пораки за утеха до семејствата.
„Република Косово пред само кратко време доживеа ваква трагедија и добро знае колкава е болката, но и потребата да се реагира брзо, па ќе останеме блиску до нашите пријатели во овие тешки моменти“, истакна Вјоса Османи.
Неверување и тага за страшната вест изрази претседателот на Србија Александар Вучиќ преку телеграмата упатена до Пендаровски и Заев.
„Не постојат зборови со кои може да се опише болката што ја споделуваме со граѓаните на вашата земја. Молчејќи пред оваа трагедија упатуваме молитви за утеха до семејствата на жртвите и до целиот братски народ“, вели Александар Вучиќ.
Длабоко сочувство и тага за трагичната несреќа во Бугарија упатуваат и лидери и претставници на политичките партии во земјава, како и голем број јавни институции и организации.
Во раните утрински часови автобус на Беса Транс се преврте на автопатот Струма во Бугарија при што загинаа 46 лица, а 7 се повредени и се на лекување во софиската болница. Голем дел од загинатите се деца и млади луѓе кои за продолжениот викенд биле во Истанбул. Од рано изутрина таму е премиерот Зоран Заев и министрите за здравство Венко Филипче и за надворешни работи Бујар Османи. Tие ги посетија повредените, а за причините за несреќата очекуваат тоа да го соопштат бугарските служби.