Вториот ден од генералниот штрајк во училиштата и градинките мина без состанок меѓу СОНК и претставници на Владата. Според најавите од двете страни во понеделникот, нова средба ќе има деновиве во обид да се постигне решение за барањата на Синдикатот.
СОНК не отстапува од барањето за зголемување на платите на вработените во дејностите образование и детска заштита, и тоа веднаш, за 18,4 отсто, согласно порастот на минималната плата која од овој месец изнесува 18.000 денари и, дополнително, таа да биде основица со која ќе се множат коефициентите на сложеност на работни места.
Претседателот на СОНК, Јаким Неделков вчера соопшти дека од Владата очекуваат покана за работна средба на која повторно ќе ги изнесат своите аргументи за издржаноста на нивните барања. Се надева дека ресорните министерства или Владата ќе излезат со конкретен предлог за зголемување на платите кој ќе биде прифатлив од мнозинството негови членови.
„Со тоа би се донело одлука за прекин на штрајкот во најкус можен рок и продолжување на нормалниот тек на воспитно-образовниот процес“, објави Неделков на Фејсбук, кој за текот на вториот ден од штрајкот информираше дека не биле регистрирани посериозни проблеми или притисоци врз штрајкувачите.
Премиерот Димитар Ковачевски, пак, порача дека се отворени за дијалог за раст на платите кој нема да биде условен од штрајкови и незадоволства. На својот фејсбук-профил тој напиша дека го охрабрува Синдикатот да го продолжи дијалогот за трајно решение преку заеднички утврден модел за раст на платите.
„Отворени сме за дијалог за постигнување на систем за раст на платите кој нема да биде условен и предизвикуван од штрајкови и незадоволства. Во таа насока, го охрабрувам Синдикатот да го продолжи дијалогот и да ја преземе одговорноста за трајно решение за раст на платите преку заеднички утврден модел“, напиша Ковачевски.
СОНК ја одби поддршката за штрајк од Прогресивниот синдикат на образование (ПРО), доколку се согласи со нивното барање за линеарно зголемување на платите во јавниот сектор за најмалку 2.800 денари кое, според овој синдикат кој е во состав на Сојузот на синдикати на Македонија (СММ), е најодржливо решение. ПРО при ССМ бара со Законот за наставници и стручни соработници да процентуално регулирање на идните зголемувања на платите во образованието, согласно зголемувањето на минималната плата.
„Доколку СОНК го поддржи ова наше барање, ние ќе се приклучиме официјално кон штрајкот, а, се разбира, ССМ веќе соопшти дека ги става на располагање своите капацитети во насока на спроведување на активностите кои ги преземаат синдикатите за зголемување на платите за најмалку 2.800 денари во нето износ за сите вработени, вклучително и просветните работници“, соопшти ПРО.
СОНК во реакција, во која нагласи дека „не е етички синдикат да условува друг синдикат за давање поддршка во период на генерален штрајк“, одговори дека за неговите членови е неприфатливо зголемување на платите линеарно. Останува на ставот дека вреднувањето на трудот и зголемувањето на платите треба да биде во согласност со колективните договори за што, пак, доби поддршка од Независниот академски синдикат (НАкС).
Овој синдикат укажува дека со порастот на минималецот, нужно е зголемување на платите за сите вработени, вклучително и за вработените во високото образование и науката, со цел, како што посочи, „да се избегне изедначување на надоместокот што го добиваат вработените што вршат работа со различна сложеност или различен степен на образование“.