„Ќе се кратат платите на вработените во администрацијата, во истиот сектор ќе има и отпуштања, а ќе се намалат и пензиите. Истовремено, македонската влада најави зголемување на платите на вработените во администрацијата за четири проценти“
Српскиот премиерот Александар Вучиќ вчера ги објави економските мерки со кои планира да ја менаџира кризата. Дел од мерките предвидуваат намалување на платите во државниот и јавен сектор за 10 проценти, а Вучиќ најави дека „намалувањето најверојатно ќе биде линеарно“, иако останува да се допрецизираат мерките. Од намалувањето ќе бидат исклучени оние вработени кои земаат плата пониска од 25.000 динари.
Ќе се крати и од пензионерите, но повторно ќе бидат исклучени најранливите категории пензионери кои земаат ниски пензии.
Покрај намалувањата, премиерот Вучиќ ќе започне и со отпуштања на вишокот во администрацијата.
„Платите во администрацијата се повисоки од оние во приватниот сектор за 40 проценти. На сметка на тоа, приватниот сектор е темелно уништен“, рече Вучиќ најавувајќи закрепнување на приватниот сектор со овие мерки
Српската влада на овој начин планира да заштеди 400 милиони евра и целосно закрепнување на економијата до 2016 година.
Во Македонија обратни трендови
Владата на Македонија, пак, во изминатите години континуирано ги зголемуваше како платите во администрацијата, така и вработените во тој сектор. Од идниот месец е најавено зголемување на платите во македонската администрација за 4 проценти. Истовремено, Секретаријатот за спроведување на рамковниот договор распиша оглас за вработување на нови 15о административци. Во текот на изминатите месеци на веб страницата на Агенцијата за администрација беа објавени серија огласи од институциите од државниот и јавниот сектор со кои се отвори вработување за стотици нови службеници.
Во последниот извештај за напредок кој го подготвува Европската комисија е нотирано дека се уште нема достапни официјални бројки за вкупниот вкупниот број на вработени во јавниот сектор, постојано и привремено, што го прави тешко мерењето на напредокот во постигнување на транспарентност и целите на реформите. Критики има и за начинот на кој што се вработува во тој сектор, но и за пренатрупаноста која според комисијата не е одговор на реалните потреби на институциите.
„Сè уште се потребни подобрувања на политиката, на централно и на локално ниво, за борба против политизацијата. Сите тековни вработувања на лица во јавната администрација, без оглед на статусот во државната служба, потребно е целосно да ги почитуваат начелата на транспарентност и отчетност и да се засновани на заслуги. Сè уште постојат случаи на огласи распишани по мерка за соодветен кандидат и нерегуларно вработување на кадар. Некои вработувања се спроведуваат како социјална мерка, наместо како одговор на потребите на институциите“, пишува во Извештајот за напредок за Македонија.