Сакаме да испратиме порака, да се слушне гласот на средношколците. И ние имаме свои права и ќе ги искористиме максимално, порачаа денеска струмичките средношколци кои излегоа на протестен марш по улиците низ Струмица. Тие велат дека се чувствуваат понижени, бидејќи им било одземено правото на избор на предмети за полагање.
Целта на протестот, според нив, е воведувањето на предметот математика како задолжителен предмет за државна матура, по завршувањето на четврта година и воведувањето на новитет во начинот на спроведување на електронско тестирање.
„Има голем број на ученици кои по завршување на средното училиште се определуваат за јазици или општествени науки. Воведувањето на математиката како изборен предмет за матура може да ни влијае на поените за влез во државната квота на уписот на факултет. Не сме сите склони кон математиката, ова е невиден апсурд, вели Вања Китанова ученичка во четврта година од СОУ „Јане Сандански“.
„Идејата е да се направи промена, бидејќи новите реформи во образованието лично влијаат на средношколците. Не е исто да полагаш мајчин јазик и математика, тежината не е иста. Најпогодени сме ние средношколците од општа гимназија, нека го има предметот математика за оние кои ќе се одлучат да полагаат на факултетите по природни науки, но не и на државна матура“, вели Марија Црвенкова.
Тие додаваат дека револтот е голем бидејќи претходно овој предмет беше изборен, а од оваа година се воведува како задолжителен. Средношколците изјавија дека е направен средношколски пленум и дека очекуваат голема поддршка за натамошните активности.
По завршувањето на маршот најавија дека ќе продолжат со протест и утре. Дел од нив велат дека ќе продолжат и со порадикални чекори доколку Министерството за образование не ги слушне нивните барања.
