Судењето за пожарот во модуларната болница во Тетово се презакажа за 14 октомври во 10 часот. Причина за поместување на денешното рочиште е отсуството на дел од обвинетите.
Обвинителството на 27 јули поднесе обвинителен предмет од Основен суд Тетово. Со тој предлог ОЈО Тетово ги обвини двајцата директори на Клиничка болница Тетово (Ф.Б. и А.Е.) за кривично дело „тешки дела против општата сигурност“ и докторот Б.В. за кривично дело „непостапување според здравствени прописи за време на епидемија“, додека правното лице ЈЗУ Клиничка Болница Тетово за кривични дела „предизвикување на општа опасност и непостапување според здравствени прописи за време на епидемија“
Десет месеци траеше истрагата на Обвинителството, период во кој беа направени стручни анализи и вештачења од МВР, од Технолошкиот факултет, од електроинжинер и од експерти и истражители од сојузната криминалистичка полиција на Германија.
Во октомври 2021 година, по вештачењето на МВР, Обвинителството информираше дека пожарот во модуларната настанал во Тетово како последица на запален продолжен кабел, на кој бил приклучен дефибрилатор-апарат за реанимација, полнач за мобилен телефон и уште еден уред, информираше обвинителството.
Тогашните двајца директори на тетовската болница поднесоа оставки, но останаа на функциите сè до преструктуирањето во Владата. Пожарот во модуларната ковид болница се случи на 8 септември лани. Во огнената стихија, која за неколку минути до темел го изгоре објектот, животот го загубија 14 луѓе, а повеќе пациенти беа тешко повредени.