Нема докази дека сообраќајната незгода во која настрада новинарот и основач на неделникот „Фокус“ е резултат на сторено кривично дело. Со ова денес јавното обвинителство ја окфалификува смртта на Младенов како несреќен случај.
На долгата прес конференција на која присуствуваа Државниот јавен обвинител Марко Зврлевски, шефицата во скопското јавно обвинителство Гордана Гешковска и министерката за внатрешни работи Гордана Јанкуловска, се поставуваа многу прашања, а на голем од нив новинарите не добија одговори.
Гешковска рече дека смртта настапила по пукање на аортата, но не знаеше кога точно настапила смртта и на новинарката која праша и посочи дека било вообичаено да не се знаат такви детаљи.
-Судска медицина не само во овој, туку и во многу други случаи не може да го утврди точното време на настапување на смртта, рече Гешковска.
На прашањето на новинарот дали тоа значи дека нема ни време кога точно се случила несреќата, Гешковска рече дека единствено може да се каже дека смртта настапила ноќта помеѓу 26 и 27 Март.
Обвинителството разговарало само со сопругата на Никола Младенов, Билјана Младенова, а биле проверени и телефонските листи од неговите разговори тој ден. Последен пат разговарал од Трнодол и Капиштец во 16 45.
Не биле испрашани вработените на патарините кај Велес, бидејќи обвинителството сметало дека нема потреба, а снимки од камерите немало затоа што, според обвинителството, камерите на тој автопат не работеле или не биле поставени.
Едно од прашањата на кои инсистираа новинарите беше каде е телефонот на Младенов. Гешковска демантираше дека Младенов бил лоциран по телефонот, но исто така, рече дека кај него и на местото на несреќата не бил пронајден телефонот.
Во горното видео НОВА ви го прикажува излагањето на обвинителството пред јавноста за деталите од истрагата за смртта на Никола Младенов, а во второто видео подолу можете да ги слушнете новинарските прашања и одговорите на Гешковска.