Стејт департментот на САД подготвил писмо со честитки за првата жена претседателка на Северна Македонија, Гордана Силјановска – Давкова, но тоа никогаш не било објавено.
За време на нејзината инаугурација, претседателката Силјановска – Давкова го оживеа долгогодишниот спор за името со Грција, нарекувајќи ја нејзината земја „Македонија“ наместо официјалното име „Северна Македонија“, пишува грчкиот весник То Вима.
Во текстот се наведува дека наместо официјално писмо од државниот секретар Антони Блинкен, помошникот државен секретар за европски прашања, Џејмс О’Брајан, упати честитки преку објава на социјалната мрежа Икс.
Извори за „То Вима“ потврдиле дека оваа одлука има за цел да го пренесе незадоволството за прекршување на одредбите од Договорот од Преспа за време на нејзината инаугурација и последователните настани.
Оваа неизвесност ја зголемува вознемиреноста за иднината на Западен Балкан, фрлајќи сенка врз регионот во еден критичен период, се додава во текстот на грчкиот влијателен весник То Вима.