Рускиот олигарх Роман Абрамович и украински мировни преговарачи имаа симптоми што укажуваат на можно труење по состанокот во Киев претходно овој месец, јави Волстрит Џурнал, повикувајќи се на лица запознаени со ова прашање.
По состанокот во украинскиот главен град, Абрамович, кој патуваше до Москва, Лавов и другите места за преговори, како и најмалку двајца високи членови на украинскиот тим, развија симптоми кои вклучуваат црвени очи, постојано и болно солзење и лупење кожа на лицата и рацете, изјавија лица кои се запознати со настаните.
Тие за осомничениот напад ги обвинија тврдокорните во Москва за кои рекоа дека сакале да ги саботираат разговорите за ставање крај на војната. Лице блиско до Абрамович рече дека не е јасно кој ја таргетирал групата, посочува весникот.
Абрамович и украинските преговарачи, меѓу кои е и пратеникот Рустем Умеров, оттогаш се подобро и нивните животи не се во опасност.
Претседателот на Украина, Володимир Зеленски, кој се состана со Абрамович, не бил погоден, велат тие. Портпаролот на Зеленски рече дека нема информации за сомнително труење.
Западните експерти кои го разгледаа инцидентот велат дека е тешко да се утврди дали симптомите се предизвикани од хемиски или биолошки агенс или од некаков напад со електромагнетно зрачење, велат луѓето запознаени со ова прашање, пишува Волстрит џурнал.
Во меѓувреме портпаролот на Роман Абрамович потврди дека постојат сомневања дека рускиот олигарх бил отруен претходно овој месец по состанокот на кој се разговарало за мировни преговори со украинските преговарачи.
Се вели дека Абрамович е веќе добро, бидејќи инцидентот се случил пред неколку недели, и ќе продолжи со преговорите со украинските власти во обид да се стави крај на војната.
Блиски на Абрамович тврдат дека тој учествувал на неколку состаноци и работи само во свое име, откако беше соопштено дека од него била побарана помош.