Состојбата со недостаток на судии може да се надмине со внатрешна реорганизација на судството. Тоа нема да биде едноставно, но јас сум оптимист дека ниту еден од предметите кои ги работеле судиите што веќе се во пензија нема да остане нераспределен, изјави денеска министерот за правда Никола Тупанчески.
Бројот на судиите во нашето општество, рече дека е природно намален поради генерациска смена на судиите и за ова било сигнализирано уште на почетокот, но секогаш постои можност за надминување на состојбата со повеќе законски текстови.
„Последната изјава на претседателот на Собрание беше дека седницата е прекината и останува неизвесно како ќе биде предложено, кога ќе биде предложено и дали ќе биде продолжена. Во меѓувреме не смееме да останеме со скрстени раце. Напротив, треба да изнајдеме решение оптимално за да може да се одговори адекватно на предизвикот којшто настана после 30 јуни, појасни Тупанчески, во однос на можноста за продолжување на рокот за одење во пензија на судиите.
Тупанчески, исто така, појасни дека тие се движат во рамките на сопствените ингеренции во изнаоѓањето на решение за овој проблем.