Британската полиција соопшти дека убиството на пратеникот Дејвид Ејмс вчера во Есекс било терористички напад, пренесоа светските агенции. Истрагата ја води полициската единица за борба против тероризмот во Лондон. Во соопштението во раните утрински часови денеска, полицијата во британската престолнина го опиша нападот како терористички напад, додавајќи дека истрагата „открила потенцијален мотив поврзан со исламистичкиот екстремизам“.
Шеесет и деветгодишниот Ејмс од Конзервативната партија на премиерот Борис Џонсон беше избоден повеќепати во напад вчера попладне во Методистичка црква во местото Лиј, источно од Лондон. Дваесет и петгодишен маж бил приведен на местото на злосторството под сомнение за убиство, а полицијата запленила нож. Службите за итна медицинска помош се обиделе да го спасат пратеникот, но не успеале.
Полицијата не го откри идентитетот на осомничениот. Оттаму тврдат дека тој дејствувал сам и не барал други лица во врска со убиството, иако истрагата е во тек. „Во рамките на истрагата, се вршат претреси на две адреси во областа Лондон“, додаде полицијата.
Според Sky News, уапсениот маж е британски државјанин со сомалиско потекло. Политичарите го опишаа атентатот како напад врз демократијата, а претставници на целиот политички спектар во Британија му оддадоа почит.