Хрватскиот претседател Зоран Милановиќ, на отворање на седницата на собранието на Светската здравствена организација (СЗО), рече дека со „голема тага и неверување“ ги гледа нападите врз болниците и здравствените установи во Украина, но дека ова не е единствената криза што заслужува светско внимание.
Војната во Украина, поврзаните глобални закани и бескрајната пандемија на ковид-19 се темите на состанокот на 194 земји-членки на СЗО во Женева во обид да се изгради поефикасен и правичен систем на здравствена заштита.
„Здравје за мир, мир за здравје“, е мотото на 75-та сесија на Светското здравствено собрание (WHA), што се одржува во екот на војната во Украина и по првпат во живо од почетокот на пандемијата на ковид-19.
Милановиќ рече дека мотото враќа живи спомени од гранатирањето на болници, здравствени установи и амбулантни возила кои превезуваа жртви за време на војната во Хрватска во 1990-тите, како и за здравствената состојба предизвикана од голем број цивилни жртви. „Дури и детските болници не беа безбедни засолништа во тоа време“, рече тој.
Тој додаде дека Хрватска со голема тага и неверување ги следи нападите врз болниците и здравствените установи „во Украина, но дека ова не е единствената криза со која се соочува светот.
„Можеби е во најголем фокус, но има многу конфликти кои се појавуваат на глобално ниво и кои ја заслужуваат нашата подеднаква поддршка и внимание“, рече Милановиќ.
Тој повика на поголема подготвеност во идните кризи.
„Потребна нѝ е посилна и поинклузивна здравствена архитектура и мора да се подготвиме за идната закана по здравјето, рече Милановиќ, додавајќи дека пандемијата на ковид-19 ја покажала „големата слабост во глобалниот здравствен менаџмент“.