Утре со почеток во 19 часот, во Македонска Радио Телевизија, ќе се промовира новата евровизиска песна. Премиерата на новата песна ќе биде дел од снимањето на познатото шоу „Танц со ѕвездите“.
Победникот на „Евросонг“ од оваа година ќе се бира според нови правила и отсега секоја песна ќе биде оценувана, а изведувачите подеднакво ќе мора да се борат за симпатиите на жирито и публиката. Со други зборови, „соседското“ гласање кое досега значително го поправаше пласманот на натпреварувачите од регионот, ќе биде значително послабо.
Од оваа година, жирито, на основа на сопствените проценки, ќе ги рангира сите песни (освен тие од сопствените држави), од најдобри до најлоши. Истата процедура ќе се повторува и за гласовите на публиката, а потоа ќе се формираат редните места на основа на збирот на бодовите.