Поранешниот претседател на Врховниот суд Јово Вангеловски кој беше суспендиран и разрешен од Судскиот совет, пред истекот на законскиот рок поднел две жалби – потврдија за НОВА извори од Советот.
Тој барал да се преиспита и одлуката за суспендирање, иако според извори во Советот нема право на тоа. Со оваа одлука, Вангеловски беше времено оддалечен од вршење на судиската функција и од функцијата претседател на суд, со што практично му беше забрането и да влезе во зградата на Судот.
За жалбата која ја поднел во однос на одлуката за разрешување, таа ќе биде доставена до Врховниот суд кој треба да формира комисија составена од тројца судии од Врховен, по еден од четирите апелациски подрачја и двајца судии од матичниот суд на разрешениот судија.
Доколку се прифати жалбата на Вангеловски, случајот повторно ќе се врати во Судскиот совет, кој одново ќе одлучува за негово разрешување.
Судскиот совет на седница одржана на 10 септември едногласно донесе одлука да го разреши претседателот на Врховниот суд Јово Вангеловски за нестручно и несовесно работење во службат. На истата седница разрешена беше и врховната судија Рахилка Стојковска – и двајцата поради одлуката која ја донесоа а со која му го укинаа притворот на Сеад Кочан, обвинет во случајот Труст и му овозможија тој да не оди во притвор.
За предметот за Сеад Кочан, претставка до Судскиот совет за нестручно работење беше поднесена и против Врховниот судија Ристо Катавеновски со чиј глас петчлениот совет во Врховен донесе одлука (со 3 гласови за и двајца против), Кочан да се брани од слобода. Катавеновски подолго време има здравствени проблеми и отсуствува од работата на Судот, па Судскиот совет до сега не успеал ни да му го достави известувањето дека против него е поднесена пријава за несовесно работење.
Извори од Советот велат дека неколку пати испраќале курир, но Катавеновски не бил во Врховниот суд.
Од Врховениот суд за НОВА потврдија дека судијата поради здравствени проблеми извесно време бил на боледување.
Судскиот совет пред пет дена објави оглас за врховни судии, по апелот на в.д. претседателот на Врховен Фаик Арслани, дека овој суд е блокиран и не може ефиаксно да работи поради намалениот број на судии.