Судскиот совет едногласно донесе одлука да го разреши досегашниот претседател на Врховниот суд Јово Вангеловски за нестручно и несовесно работење во службата, потврдија за НОВА од Судскиот совет.

Според новиот Закон за Судски совет Вангеловски има право да поднесе жалба до Врховниот суд, но тоа не ја одложува денешната одлука на Судскиот совет за негова суспензија од судиската функција.

За евентуалната жалба на Вангеловски ќе одлучува деветчлен судски совет во Врховниот суд,  составен од тројца судии од Врховен, по еден од четирите апелациски подрачја и двајца судии од матичниот суд на разрешениот судија.

Доколку прифатена жалбата на Вангеловски, случајот повторно се враќа во Судскиот совет.

За ВД Претседател на Врховниот суд, Судскиот совет го избра Фаик Арслани.

Барањето за разрешување на Вангеловски беше поднесено пред повеќе од две години, поради одлуката со која му овозможи на Сеад Кочан, обвинет во случајот Труст да не оди во притвор.

Покрај Вангеловски, на денешната седница на Судскиот совет е разрешен и Рахилка Стојковска за нестручно и несовесно работење.

Вангеловски не присуствуваше на денешната седница на Судскиот совет. Toј на барање на НОВА за коментар за разрешувањето рече дека нема да дава никаква изјава.

Вангеловски – функцијата претседател на Врховниот суд ја извршуваше во два мандати. Прв пат за претседател на Врховниот суд беше избран во 2008 само два месеци откако стана врховен судија.  На оваа позиција остана се до 2012 година.

Јово Вангеловски доби втор мандат како претседател на највисокиот суд во земјата, на итна седница на Судскиот совет во 2017 година. За оваа функција тогаш беа номинирани и судиите Лидија Неделкова, Снежана Бајлозова и Беса Адеми.

На почетокот на годинава Врховниот суд донесе правно мислење со кое ги прогласи за незаконски сите истраги и обвиненија  што СЈО ги отвори по јуни 2017 година.