Проширувањето на Европската унија отсекогаш предизвикувало силни мислења и емоции, чувство на екстремен оптимизам и екстремен песимизам. Многу повеќе од другите политики, истакна еврокомесарот Оливер Вархеји на Форумот за граѓанското општество во Западен Балкан. Тој кажа дека од неговото долгогодишно искуство, она во што верува дека е навистина потребно за успехот на политиката за проширување е вистинската посветеност и, како што вели, политиката за проширување има вистинска трансформативна моќ.
-Тоа е геостратешка инвестиција во мир, стабилност, безбедност и економски раст во цела Европа. Патот кон ЕУ сепак е долг и комплициран и полн со предизвици. Но, оние кои се навистина посветени успеваат. И за мене не постои сомнеж – иднината на Западен Балкан е Европската унија и нашите партнери се посветени на оваа цел. И анкетите за јавното мислење потврдуваат дека имаат силна поддршка од нивното население за да го достигнат, истакна еврокомесарот.
Вархеји додаде дека има воспоставено рамка што го издржала тестот на времето, односно критериумите од Копенхаген кои важат денес како и кога беа воспоставени пред речиси 30 години. Исто така, рече Вархеји, имаме пристап кој политички, технички и финансиски го поддржува изборот на политиката на нашите кандидати на нивниот пат кон пристапување.
-Секако, го рафиниравме овој пристап со текот на времето, неодамна преку ревидираната методологија за пристапните преговори, со цел да се направи процесот поверодостоен, подинамичен, попредвидлив и со посилен политички правец. Паралелно, го започнавме Економскиот и инвестициониот план, што ќе доведе до речиси 30 милијарди евра инвестиции во регионот што ќе донесат економски развој и закрепнување. Заедно со Економскиот и инвестициониот план, регионот се согласи да се создаде заеднички регионален пазар. Ова е витален елемент на Планот. Потребни се нови патишта, подобрени железнички пруги, обука на работници со вештини, отстранување на технички и административни бариери, долги царински проверки, технички пречки во трговијата. Значи, да го надградиме веќе постигнатиот напредок и да го искористиме целиот потенцијал од Економскиот инвестициски план и Заедничкиот регионален пазар, порача Вархеји.
Тој подвлече дека од сега па до крајот на годината постојат значителни можности да се зајакне соработката и да се даде нов импулс.
-Самитот ЕУ-Западен Балкан следната недела ќе ја потврди нашата посветеност кон регионот. ЕУ им обезбеди на нашите партнери од Западен Балкан неспоредлив пакет за поддршка од 3,3 милијарди евра за време на кризата КОВИД-19. ЕУ финансираше или донираше речиси 2,8 милиони дози за Западен Балкан, а уште 1,7 милиони вакцини пристигнаа преку КОВАКС. Се разбира, треба да напредуваме и кон пристапните преговори. Пакетот за проширување на Комисијата оваа есен е важен момент за да се оценат земјите од регионот колку тие ги исполниле своите обврски. Тоа е, исто така, потсетник за земјите-членки да го исполнат своето, рече еврокомесарот.
Кога станува збор за Албанија и Северна Македонија, додаде тој, едноставно можам да ги повторам зборовите на Фон дер Лајен: Сакаме да видиме како Советот е согласен за преговарачките рамки што ќе му овозможат на словенечкото претседателство да ги свика првите меѓувладини конференции. Двете земји ги исполнија договорените предуслови, а ЕУ треба да испорача.