„Ноќ на истражувачи“ ќе се одржи во петок на плоштадот Македонија во Скопје, во периодот од 18 до 23 часот.
Проектот „Ноќ на истражувачи“ е финансиран од Европската унија и е дел од Седмата рамковна програма „Марија Кири”.
„Целта на оваа активност е на забавен и интерактивен начин да ја доближиме науката до јавноста, како основен двигател на општествениот и економскиот развој. Настанот опфаќа низа активности и промотивни настани кои се насочени кон различни возрасни групи. Така, најмалите ќе имаат можност да го истражуваат небото и планетите во Планетариумот во Скопје. На самиот ден граѓаните ќе имаат можност да се напијат кафе со неколку еминентни научници од различни области во кафе Фиренца во 11 часот и да поразговараат за првиот робот во Македонија”, информираат организаторите, Факултетот за Деловна економија и организациони науки, Универзитет Американ Колеџ Скопје.
Активностите започнуваат во 18 часот со квиз за Европа во Европското катче, понатаму со презентација на научни постери и со интерактивна игра за тинејџерите „Истражи ја Македонија – Потрага по богатство“ околу Градскиот плоштад во Скопје.
Секој има можност да учествува со пријавување на соодветните штандови, да решава гатанки, да пронаоѓа историски локации и да добие интересни награди.
Во 18.30 часот ќе се презентираат можности за стипендии и проекти, и во 19 часот започнува можноста за тестирање на мириси и се отвора катчето за забава. Во катчето за забава ќе има активности за најмладите, но и за повозрасните истражувачи кои сакаат да истражуваат и да изработуваат оригами, фигури од глина, да сликаат, и да видат необични хемиски експерименти.
Видеата од видео натпреварот за студенти ќе бидат презентирани околу 19:30 часот, по што ќе следат и другите награди за најдобар научен постер и за најдобар есеј на тема „Науката е во тебе, љубопитноста е… насекаде. Кон европски развој!”.
Од 20.30 часот започнува пантомима претставата „Љубопитни за Теоријата на Чарлс Дарвин“.
Организацијата ги помага истражувачите како индивидуи, се одржува четвртиот петок во месец септември во над 300 градови ширум Европа. На тој ден низ цела Европа се организираат интересни и забавни активности преку кои се покажува колку е возбудлива науката и колку е присутна во секојдневниот живот.