Повеќе од 200 дела од исто толку автори ќе бидат изложени во галеријата „Остен“, на 41. светска галерија на карикатури, која ќе биде отворена вечерва.
Од „Остен“ велат дека на годинашното издание на манифестацијата се пријавиле 407 карикатуристи од 63 земји во светот, со повеќе од 1.580 дела.
„Пристигнатите карикатури освен што беа многу на број, беа со исклучителен квалитет. Конкурсот не беше на зададена тема и авторите можеа слободно да творат. Тие наоѓале инспирација во религијата, политиката, екологијата, во секојдневниот живот“, вели Корнелија Конеска, уметнички директор на „Остен”.
Од сите пристигнати дела, карикатуристот Мирослав Георгиевски-Миро и претставници од „Остен“ селектирале 246 карикатури од 246 автори. Нив потоа ги оценувало меѓународно жири во состав: Ленг Му од Кина, карикатурист и директор на музејот на карикатури „Гугл М“, Лиза Донели од американски „Њујоркер“, Петер Писметровиќ од Австрија, Ердоган Басол од Турција и Мице Јанкуловски од Македонија. Првата награда за карикатура му ја доделија на Јури Кособукин од Украина, кој почина во јануари годинава. Првата награда за сатиричен цртеж ја доби Мехмет Арслан од Турција, а наградата за стрип му припадна на Саед Садеги од Иран. Две од наградените дела се со религиска содржина. Од галеријата информираат дека ниту еден од наградените нема да дојде во Скопје.
Годинава жирито додели и 11 специјални награди, од кои една му припадна на македонскиот карикатурист Блаже Докулески.