Британските власти депортираа 20 албански државјани со чартер – лет во Тирана, по издржување на затворските казни за различни кривични дела. Биле осудени на вкупна затворска казна од над 46 години, повеќето од нив за трговија со дрога, како и нелегално поседување оружје.
Државната секретарка за внатрешни работи Прити Пател изјавила дека тие луѓе се опасни криминалци за животот во заедницата во Велика Британија.
„Овие криминалци ги прекршија нашите закони и вредности и ние нема да запреме пред да ги отстраниме оние кои немаат право да бидат тука. Тие се одговорни за ужасни престапи, вклучително и вмешаност во снабдувањето со дрога од класа А, што има разорно влијание врз луѓето, нивните семејства и нашите заедници. Од 2021 година, протеравме околу 1.000 албански престапници, вклучително и некои кои илегално го преминаа Каналот за да дојдат во Обединетото кралство“, изјавила Пател, пренесуваат албанските медиуми.
Врз основа, пак, на договорот меѓу двете земји за трансфер на затвореници, годинава се предадени 236 албански државјани кои затворските казни ќе ги доиздржуваат во Албанија.
Според Пател, минатиот месец биле депортирани 243 странци кои ги прекршиле законите, додека од јануари 2019 до крајот на декември 2021 година 10.741лица.