За време на вчерашната расправа во Европскиот парламент, за понатамошната судбина на Грција во еврозоната и Европската Унија, грчкиот премиер Алексис Ципрас од европарламентарците бил дочекан со аплауз.
Своите разочарувања, критики и сугестии, сепак најексплицитно ги искажал поранешниот премиер на Белгија и претседател на Сојузот на либералите и демократите за Европа во ЕП, Ги Верхофштат.
Тој за време на својот говор, кој во неколку наврати беше проследен со аплауз, му порача на Ципрас дека е време да претстави конкретни предлози за постигнување договор со европските партнери а не да се служи само со зборови.
Изборот е многу едноставен, како сакате да бидете запаметени? Како изборна несреќа која го осиромаши својот народ, или господине Ципрас сакате да бидете запаметени како прав револуционер – реформатор, во традицијата на Трикупис (Карилаос) и Венизелос (Елефтериос), и не зборувам за новиот Венизелос, туку за оној стариот, големиот лидер помеѓу двете светски војни, либерал кој ја модернизираше Грција. Тоа е изборот кој треба да го направите, му рече меѓу другото Верхофштат на грчкиот премиер, изразувајќи подготвеност да допатува во Атина и да седне на маса директно со него.
Според поранешниот премиер на Белгија, моќта е во Ципрас бидејќи како никогаш досега во грчката историја, еден премиер уживал толку голема поддршка.