Душко Весковски, директорот на скопското Јавно претпријатие Водовод и Канализација, ги демантира наводите на опозициската партија ВМРО-ДПМНЕ, дека за време од девет месеци потрошил 22.000 евра на кафе и кафеани.
– Во изминативе четири години ниту еднаш лично не сум искористил средства од ЈП Водовод и канализација – Скопје за кафе, кафеани и ресторански услуги. Само за споредба во 2016 година кога на чело на претпријатието е кадар на ВМРО-ДПМНЕ за спонзорства и донации се потрошени 19,170,983 денари, а во 2021 година се потрошени 2,235,170 денари, средства кои се искористени за потребите на синдикатот на претпријатието со што се изврши реновирање на одмаралиштето во Претор кое го користат вработените на ЈП Водовод и канализација – Скопје. Никогаш во изминативе четири години не сум користел службен мобилен апарат и не се трошени средства на претпријатието за набавка на скапи мобилни телефони. Согласно извештајот за работењето на претпријатието за период од 01.01.2021 заклучно со 31.09.2021 година ЈП Водовод и канализација – Скопје има остварено добивка во висина од 59,033,858 денари. Како во изминативе три години така и оваа година извршена е ревизија за работата на претпријатието од страна на независна надворешна ревизорска куќа која нема забелешки за работата на претпријатието, се наведува во демантот на Весковски.
Според него, ова се паушални и манипулативни толкувања на извештајот за работата на претпријатието од страна на советниците на ВМРО-ДПМНЕ во Град Скопје и на портпаролот Наум Стоилковски , а се во функција на внатрепартиската пресметка за избор на директор на ова јавно претпријатие, наведува Весковски.
Претходно преку партискиот портпарол Стоилковски, ВМРО-ДПМНЕ го обвини Весковски дека од парите на ЈП Водовод за кафе и кафеани за девет месеци има потрошено 1.323.419 денари. Оваа година речиси 22 илјади евра и дека толку пари биле потрошени од ЈП Водовод за репрезентација според извештајот кој што беше презентиран пред јавноста на седницата на Советот на Град Скопје, велат од ВМРО-ДПМНЕ.