Бугарскиот премиер, Кирил Петков, заедно со потпретседателката Илија Јотова, министерката за надворешни работи Теодора Генчовска и пратеничката и екс шефица на дипломатијата, Екатерина Захариева, како дел од официјалната бугарска делегација, пристигнаа во посета на Битола.
Генералниот конзулат на Бугарија во Битола беше првата адреса што ја посетија високите бугарски гости, а попладнево е најавено нивно присуство на свеченоста во клубот при Центарот за култура „Иван Михајлов“ кој треба да го отвори премиерот Петков.
Потоа, бугарскиот премиер Петков и министерката Генчовска, заедно со своите домаќини, македонските министри за надворешни работи Бујар Османи и за транспорт и врски, Благој Бочварски ќе извршат увид на електроенергетскиот проект „Битола 2“, кој е во рамки на Коридор-8 и наменет е за реализација на интерконекција меѓу Северна Македонија и Албанија
Во 16:30 часот, делегацијата ќе го посети и Охрид, а ќе има и прошетка околу стариот град. Утре делегацијата на Бугарија ќе положи венци пред споменикот за загинатите 15 бугарски туристи од бродот „Илинден“ во 2009 година.
Потпретседателката Јотова во недела во Охрид каде ќе го посети Дневниот центар за деца со аутизам. Проектот е финансиран од бугарската влада, како дел од програмата на Министерството за надворешни работи „Бугарска развојна помош“. Јотова ќе присуствува и на отворањето на канцеларија на Здружението за толеранција и соработка „Хоризонти“.