Јулија Тимошенко беше триумфално пречекана вечерва на плоштадот Мајдан во Киев каде што ја чекаа 50.000 луѓе. Со солзи во очите и седната во инвалидска количка, Тимошенко ги поздрави „хероите на Украина“. „Вие сте најдоброто нешто во Украина. Кога мирот ќе се врати наша задача ќе биде да направиме се за да изчезне стравот кај милионите Украинци“, рече таа.
Таа зборуваше за немирите во минатите денови: „Снајперите пукаа во срцето на нашите луѓе, од тие куршуми секогаш ќе страдаме. Но ако не ги судиме сите тие луѓе, ќе ни биде срам“, рече Тимошенко. Таа ги осуди политичарите кои го издадоа народот: „Барам прошка од вас во име на сите политичари. Ако тие беа достојни немаше да има пролевање на крв.“
Јулија Тимошенко излезе од затвор откако украинскиот Парламент донесе закон кој тоа го овозможи.
Претседателот на Европската комисија Хозе Мануел Баросо на својот твитер го поздрави ослободувањето: „Го поздравувам ослободувањето на (Јулија) Тимошенко. Независно судство е неопходно за демократска Украина“, напиша тој.
Во Каркив, каде што опозиционерката беше во болница блиску до затворот, стотици луѓе скандираа: „Јулија е ослободена!“ Хероината на Портокаловата револуција, со својата плетенка во косата, ги поздравуваше со раката и замина за Киев, на плоштадот Мајдан.
„Диктатурата падна“, напиша таа на интернет сајтот на својата партија.