Познатата австралиска рап-музичарка Иги Азалеа синоќа на отворањето на 21. фестивал „Егзит“ во Нови Сад на главната сцена создаде вистински спектакл и мултимедијално музичко шоу.
Концертот го започна со нејзиниот хит „Work“, инаку деби сингл, на големо воодушевување на публиката, главно тинејџери и припадничките на понежниот пол, која е нејзина главна целна група.
Според проценките на организаторите, околу 42.000 луѓе го следеа нејзиниот концерт на главната сцена, кој следеше по спектакуларно долгиот огномет и отворањето на Егзит и концертот на популарната регионална ѕвезда Сенида.
Егзит годинава е со рекордна посетеност, има илјада музичари кои на 40 бини ќе ги развеселуваат десетиците илјади гости од целиот свет.