Штрајкот во образованието не е официјално прекинат, но оди во таа насока, откако претставници на СОНК и Владата попладнево договорија зголемување на платите за 12 проценти, почнувајќи од месец јули. Ова го истакна претстедателот на СОНК, Јаким Неделков по средбата во Владата на која учествуваа министерот за образование и наука, Јетон Шаќири, министерката за труд и социјална политика,, Јована Тренчевска, премиерот Димитар Ковачевски, но и директорката на Европската конфедерација на синдикати во образованието, Сузан Флокен.
„Членството ќе биде детално информирано за разговорите и се надевам дека во интерес на децата, во интерес на учениците, во интерес на родителите, на нашите вработенби кои штрајкуваа и севкупно во интерес на државата, штрајкот ќе заврши на општо добро и задоволство на сите. Жалам што минавме толку денови во штрајк, а не најдовме евентуално решение многу порано“, порача Неделков.
Конечниот збор за прекин на штрајкот, СОНК ќе го соопшти утревечер и доколку одговорот на членството биде позитивен, тогаш учениците би требало да се варатат на настава од среда.
Денешните разговори со претставниците на Владата кои траеја три и пол часа, ги опиша како „тешки и макотрпни преговори“.
„Извршивме сериозни анализи на нашите барања што беа доставени до ресорните министерства од една страна и аргументите на Владата од друга страна. На крајот се усогласивме со ставовите и во рамки на можностите на државата, дојдовме до заеднички процент на зголемување на платите од 12 отсто кој би почнал да се применува најдоцна од јули, со завршување на ребалансот на Буџетот“, истакна Неделков.
Тој нагласи дека биле отворени и договарани и други прашања, како изработка и усогласување на Колективни договори за детска заштита, за основно и за средно образование кои се однесуваат на приправници, за патни трошоци, за регрес за годишен одмор ќе се регулираат со Општиот колективен договор. Со резултатите од денешната средба, најави Неделков ќе биде запознато членството во текот на денот, а за утре се најавени и состаноци на регионални одбори.
С.Д.