Со филмови, слики и афоризми кои се дел од инсталацијата на уметникот Киро Урдин, во четврток со почеток во 20 часот во Музејот на Град Скопје, ќе бидат отворени Деновите на франкофонијата во Македонија, со наслов „Франкофонска пролет“ во организација на Францускиот институт.
Фестивалот обединува низа настани во театрите низ Македонија, културните центри и изложбените простори кои се однесуваат на францускиот јазик и култура.
На фестивалот ќе се играат театарски претстави на француски јазик, учествуваат наставници од Здружението на професори по француски јазик, уметници, музичари и писатели.
Програмата опфаќа Меѓународен театарски фестивал на ФДУ, театарски натпревари, натпревар во пеење на француската шансона, дебата за европската економска криза, изложби, перформанси, писателски средби и едукативни работилници.
Во Кинотека на Македонија ќе биде одржана Недела на франкофонскиот филм на која ќе бидат прикажани филмови од различни земји во светот како Бугарија, Швајцарија, Канада, Унгарија и Австрија. Меѓу филмовите ќе можат да се погледнат и „Готвачката на претседателот“ на францускиот режисер Кристијан Венсан и „Детето одозгора“ на швајцарската режисерка Урсула Мајер.