На мостот „Око“ и денеска се поставуваат 20 тина од вкупно 32 најавени скулптури на антички и средновековни кралеви, кнезови, и војсководци.
Меѓу нив се: Митскиот крал Каран, Пердика I, Аминта III, Парменион, еден од генералите во војската на Филип, Авдолеон, Филип V, Персеј, Тит Флавиј Орест, Јулија Тертила Публиј Септиј Николај, Будиј и други личности од античката историја. Другите скулптури се од византискиот период и од раниот среден век
Од двете страни на Порта Македонија се поставени спомениците на Христо Татарчев и на Павел Шатев. Спроти нив, во паркот Жена-борец е поставен споменикот на Кузман Јосифовски Питу. Спроти Мекдоналдс во центарот на градот е споменикот на Христо Узунов, пред Министерството за надворешни работи е поставен Борис Сарафов, а на кружниот тек кај Католичката црква е поставен споменикот на Васил Чакаларов.
На плоштадот Карпошово Востание, во близина на споменикот на Филип втори, или како што официјално се нарекува „Воин“, се поставени скулптури на Пресвета Богородица, Свети Никола и на Свети Петар и Павле.
Споменикот на Сарафов е подарок од скулпторката Валентина Стевановска.
Според податоци од Бирото за јавни набавки, скулптурите на мостот „Око“ чинат 170 илјади евра. Спомениците на Татарчев, Шатев и Кузман Јосифовски Питу се 213 илјади евра, Чакаларов е 350 илјади, ХристоУзунов чини 116 илјади. Спомениците на плоштадот Карпошово востание се 128 илјади евра.
Кандидатот на опозицијата, кој победи на локалните избори во Центар, Андреј Жерновски, во денешното интервју за НОВА кое ќе биде емитувано вечерва, изјави дека ќе ја консултира стручната јавност, но дека ингеренциите на општина Центар дозволуваат отстранување на спомениците, но за тоа ќе одлучат граѓаните на референдум.